વ્હાલા જ્ઞાતિજનો સાદર પ્રણામ,

​

શ્રી બેતાલીસ ગોળ દરજી કેળવણી મંડળની તા. 30.12.2018 ના રોજ રાખવામાં આવેલ મિટિંગમાં સંસ્થાના પ્રમુખ શ્રી ગોવિંદભાઈએ અગમ્ય કારણોસર પ્રમુખ પદેથી સ્વૈચ્છીક નિવૃત્તિ જાહેર કર્યા બાદ સર્વે કારોબારી સભ્યોની સર્વ સંમતિથી સંસ્થાના સુકાની તરીકે મને જવાબદારી સોંપવામાં આવી. સર્વ પ્રથમ તો હું પૂર્વ પ્રમુખ શ્રી ગોવિંદભાઈની આગેવાનીમાં કેળવણી મંડળનો જે વિકાસ થયો છે અને સમાજ ઉપયોગી કાર્યો થયેલ છે તે બદલ તેઓની પ્રસંશા સાથે આદર વ્યક્ત કરું છું. સમગ્ર સભ્યોએ મારી પ્રમુખ તરીકે પસંદગી કરી તે બદલ સર્વે નો ધન્યવાદ પાઠવું છું. જોકે હું કેળવણી મંડળ સાથે ઘણા સમયથી જોડાયેલ હતો પણ મને એક પ્રમુખ તરીકેની કપરી જવાબદારી વહન કરવાનું કહેવામાં આવશે તેવી મેં કલ્પના પણ કરી ના હતી. સમગ્ર જ્ઞાતિજનોએ મારામાં અને મારી ટીમમાં વિશ્વાસ મુક્યો છે ત્યારે મારી પ્રાથમિક ફરજ થઇ પડે છે કે મારે આપણી આ ગૌરવવંતી સંસ્થાને આગળ લઇ જવી. મારી પાસે અનુભવ પ્રમાણમાં ઓછો છે પણ મારી નિષ્ઠા, પ્રામાણિકતા અને ફરજ પ્રત્યેની સભાનતામાં જરા પણ કચાશ આવવા દઈશ નહિ તેની ખાતરી આપુ છું. મને મારા સમસ્ત સાથીદારોનો ખુબજ સારો સહકાર સાંપડી રહ્યો છે. અને સમગ્ર કારોબારી સભ્યો સંસ્થાના હિતમાં એક ટીમભાવનાથી આગળ વધીશું તેવી વિશ્વાસ છે. કહેવામાં જરા પણ અતિરેક નથી કે પૂર્વ હોદ્દેદારો તરફથી અનહદ પ્રેમ, હૂંફ, સહકાર અને માર્ગદર્શન મળી રહ્યા છે. તેમનો હરહંમેશ માટે ઋણી રહીશ.

 

આપણા શ્રી બેતાલીસ ગોળ દરજી સમાજના ઘડવૈયા અને દીર્ઘદ્રષ્ટિ ધરાવનાર કેળવણી મંડળના પૂર્વપ્રમુખ શ્રી ખોડીદાસ ગોવિંદભાઇ દરજી દ્વારા સમાજની નવી પેઢીને લક્ષમાં લઈને અને આપનો સમાજ આધુનિક જમાનાની સાથે તાલ મિલાવીને ચાલી શકે તે અર્થે આપણા સમાજની વેબસાઈટની શરૂઆત ઇ.સ. 2009માં કરવામાં આવેલ. શ્રી બેતાલીસ ગોળ દરજી સમાજ કેળવણી મંડળની રજત જયંતિ પ્રસંગે તા. 15.08.2009 ના રોજ સાબરમતી મુકામે આયોજિત સાધારણ સભામાં સમાજના વડીલશ્રી વાડીલાલ માધવલાલના હસ્તે www.42darjisamaj.com નામની વેબસાઈટનું ઉદ્ઘાટન કરવામાં આવેલ. પરંતુ કેટલીક ટેક્નિકલ સમસ્યાઓને કારણે આપણી આ વેબસાઈટ ઘણા વર્ષોથી બંધ હતી. સમાજના બહુધા સભ્યોની ઈચ્છા અનુસાર આપણે આ વેબસાઈટ ફરીથી ચાલુ કરી રહ્યા છીએ અને આપ સૌ તેનો બહુ સારી રીતે ઉપયોગ કરશો તેવી અમને પુરી આશા છે.

 

આદરણીય જ્ઞાતિબંધુઓ, આપણા આ કેળવણી મંડળને ખુબજ આગળ લઇ જવાની મારી તીવ્ર તમન્ના છે. મને આશા છે કે આપ સર્વે તરફથી સંપૂર્ણ સહકાર મળી રહેશે. અજાણતામાં કઈંક ભૂલ થાય, ક્ષતિ અનુભવાય અથવાતો અન્યાય થાય તો ક્ષમ્ય ગણશો.

​

આ વર્ષે દાનભેટ આપનાર તમામ દાતાશ્રીઓ, કેલેન્ડર ભેટના દાતાશ્રી, ટેલિફોન ડિરેક્ટરીનાં દાતાશ્રી, નોટબુકમાં જાહેરાત આપનાર તમામ દાતાશ્રીઓ, વિદ્યાર્થીઓને ઇનામ આપનાર દાતાશ્રીઓ તેમજ અન્ય દાન આપનાર જ્ઞાતિજનો નો ખુબ જ આભાર માનું છું અને ભવિષ્યમાં પણ આપ સૌ તરફથી આવો જ સહકાર મળી રહેશે તેવી આશા રાખું છું.

​

અંતમાં અમારી કામગીરીને લક્ષીને આપના કોઈ પણ સૂચનો હોય તો તે અમોને અવશ્ય જણાવજો. દરેક સૂચનોની સમીક્ષા કરી તે બાબતે ઘટતું કરી આપવાની હું ખાતરી આપું છું.

​

 બિપીનચંદ્ર જીવણલાલ દરજી, કલોલ
 પ્રમુખ, શ્રી બે. ગો. દરજી કેળવણી મંડળ